काठमाडौं । नेकपा
एमालेले त्रिपुरेश्वर घटनामा ज्यान गुमाएका गणेश नेपालीको मृत्युबारे सरकारले नै
जिम्मेवारी लिनुपर्ने माग गरेको छ।
शुक्रबार प्रतिनिधिसभाको बैठकमा विशेष समयमा बोल्दै एमाले सांसद भूमिका लिम्बु
सुब्बाले उक्त घटनालाई गम्भीर रूपमा लिएर निष्पक्ष छानबिन गर्न सरकारसँग आग्रह गर्नुभएको हो।
उहाँले गणेश नेपालीको मृत्युलाई एउटा व्यक्तिको निधनमा मात्र सीमित गरेर हेर्न
नहुने बताउँदै यसले राज्यका निकायको कार्यशैली र नागरिकप्रतिको व्यवहारमाथि गम्भीर
प्रश्न उठाएको उल्लेख गर्नु भयो।
सांसद सुब्बाले ट्राफिक जरिवाना तथा कार्यान्वयनको वर्तमान प्रणाली न्यायोचित
छ कि छैन भन्ने विषयमा समेत सरकारलाई समीक्षा गर्न आग्रह गर्दै घटनाको सत्यतथ्य
सार्वजनिक गर्न निष्पक्ष अनुसन्धान आवश्यक रहेको धारणा राख्नु भएको थियो।
