तेह्रथुम । वर्षौंदेखि सहज सार्वजनिक यातायातको अभाव झेल्दै आएका आठराईवासीका लागि अब
खुसीको खबर आएको छ। अब केही दिनमै आठराईका नागरिकले आफ्नै गाउँपालिकाको बसमा
यात्रा गर्न पाउने भएका छन्। आठराई गाउँपालिकाले खरिद गरेको नगर बस गाउँपालिकाको
केन्द्र सक्रान्ति बजार आइपुगेसँगै गाउँमा उत्साह र खुसी छाएको छ।
आवश्यक कानुनी तथा प्रशासनिक प्रक्रिया अन्तिम चरणमा पुर्याएको र केही दिनभित्रै बसलाई नियमित सेवामा ल्याउने तयारी गरेको गाउँपालिकाले जनाएको छ।
गाउँपालिका अध्यक्ष दिलकुमार पाहिमका अनुसार
प्रारम्भिक चरणमा बस सेवा सक्रान्ति बजार–फिदिम रुटमा दैनिक रूपमा सञ्चालन गरिनेछ। "हामी नागरिकलाई सुरक्षित, सहज, भरपर्दो र सुलभ यातायात सेवा
उपलब्ध गराउने उद्देश्यले बस सञ्चालन गर्न लागेका हौँ," अध्यक्ष पाहिमले भन्नुभयो।
अब यात्राका लागि घण्टौँ कुर्नु
नपर्ने
आठराईका बासिन्दाले वर्षौंदेखि सीमित सवारी साधन, महँगो भाडा र अनियमित यातायात सेवाको समस्या झेल्दै
आएका छन्। बिरामी बोकेर अस्पताल पुग्न होस् वा विद्यार्थी विद्यालय–कलेज धाउन, यातायात अभाव यहाँका नागरिकका लागि सधैं चुनौती बन्दै
आएको थियो।
तर, अब आफ्नै
गाउँपालिकाको बस सञ्चालनमा आएपछि त्यो समस्या धेरै हदसम्म समाधान हुने अपेक्षा
गरिएको छ। विशेष गरी विद्यार्थी, कर्मचारी, व्यापारी, कृषक तथा सर्वसाधारणलाई प्रत्यक्ष राहत पुग्ने विश्वास गरिएको छ।
रिङरोडमा पनि आफ्नै बस दौडिने
सपना
गाउँपालिकाले तत्काल फिदिम रुटबाट सेवा सुरु गर्ने
तयारी गरे पनि भविष्यको योजना अझ महत्वाकांक्षी छ। अध्यक्ष पाहिमका अनुसार आठराई रिङरोड पूर्ण सञ्चालनमा आएपछि नगर बसलाई रिङरोड क्षेत्रमा नियमित रूपमा
सञ्चालन गरिनेछ।
यसले गाउँपालिकाभित्रका बस्तीहरूलाई थप नजिक ल्याउने, सेवा प्रवाहलाई सहज बनाउने र ग्रामीण अर्थतन्त्रलाई
चलायमान बनाउने अपेक्षा गरिएको छ।
बस मात्रै होइन, विकासको नयाँ 'इन्जिन'
स्थानीयवासीले नगर बसलाई केवल एउटा सवारी साधनका
रूपमा मात्र हेरेका छैनन्। उनीहरूका लागि यो विकास, समृद्धि र आत्मनिर्भरताको प्रतीक बनेको छ।
बस सञ्चालनसँगै कृषि उत्पादन बजारसम्म पुर्याउन सहज
हुनेछ, व्यापार–व्यवसाय विस्तार हुनेछ
र पर्यटन प्रवर्द्धनमा समेत सकारात्मक प्रभाव पर्ने विश्वास गरिएको छ।
स्थानीय तहले आफ्नै पहलमा सार्वजनिक यातायात सेवा
सञ्चालन गर्न लाग्नु आठराईका लागि गौरवको विषय बनेको छ। गाउँमा विकासको नयाँ गति
थप्ने यो कदमले "समृद्ध आठराई, सहज आठराई" को अभियानलाई
व्यवहारमै रूपान्तरण गर्ने अपेक्षा गरिएको छ।
आठराईका नागरिक अहिले आफ्नै बसको पहिलो यात्राको
प्रतीक्षामा छन्। बससँगै उनीहरूका सपना पनि अब नयाँ गतिमा अघि बढ्ने विश्वास
गरिएको छ।
